शब्दयोगी अव्यय - जी अव्यये नामे आणि नामाप्रमाणे योजलेले शब्द यांच्यापुढे येऊन त्यांचा वाक्यातील इतर शब्दांशी संबंध दाखवतात त्यांना शब्दयोगी अव्यय म्हणतात. महत्त्वाची टीप: शब्दयोगी अव्यये- • शब्दयोगी अव्यये मुख्यत: नामाला किंवा नामाचे कार्य करणाऱ्या शब्दाला जोडली जातात पण कधी कधी ती क्रियापदे व क्रियाविशेषणे यांना सुद्धा लागतात. • शब्दयोगी अव्यय शब्दाला लागल्यावर बनलेला जोडशब्द त्याच वाक्यातील दुसऱ्या शब्दाशी संबंध दाखवतो. • शब्दयोगी अव्यय हे अव्यय असल्याने त्यामध्ये लिंग, वचन, विभक्तीनुसार कोणताही बदल होत नाही. • शब्दयोगी अव्यय शब्दाला लागताना, त्या शब्दाचे सामान्य रूप होते. शब्दयोगी अव्ययाचे अर्थावरून पुढील प्रकार पडतात. कालवाचक शब्दयोगी अव्यये - नंतर, पर्यंत, पावेतो, पुढे, पूर्वी, आधी स्थलवाचक शब्दयोगी अव्यये - अलीकडे, आत, जवळ, ठायी, नजीक, पाशी, पुढे, बाहेर, मध्ये, मागे, समोर करणवाचक शब्दयोगी अव्यये - कडून, करवी,करून, द्वारा, मुळे, योगे, हाती संबंधवाचक शब्दयोगी अव्यये - विशी, विषयी हेतुवाचक शब्दयोगी अव्यये - करिता, साठी, अर्थी, निमित्त कैवल्यवाचक शब्दयोगी अव्यये - च, ना, मात्र, पण, केवळ योग्यतावाचक शब्दयोगी अव्यये - समान, सम, योग्य, प्रमाणे, जोगा तुलनावाचक शब्दयोगी अव्यये - पेक्षा, तर, तम, मध्ये, परीस व्यतिरेकवाचक शब्दयोगी अव्यये - विना, खेरीज, वाचून, शिवाय संग्रहवाचक शब्दयोगी अव्यये - सुद्धा, देखील, बरीक, पण साहचर्यवाचक शब्दयोगी अव्यये - संगे, सह, बरोबर, सकट, सहित, सवे, निशी भागवाचक शब्दयोगी अव्यये - पैकी. पोटी, आतून विनिमयवाचक शब्दयोगी अव्यये - बद्दल, जागी, बदली, ऐवजी दिकवाचक शब्दयोगी अव्यये - प्रत, प्रति, कडे, लागी विरोधवाचक शब्दयोगी अव्यये - उलटे, उलट, वीण, विरुद्ध परिणामवाचक शब्दयोगी अव्यये - भर पूरक माहिती: विशेषण – नामाबद्दल विशेष माहिती सांगणार्या शब्दास विशेषण असे म्हणतात. उभयान्वयी अव्यय - दोन किंवा अधिक शब्द अथवा वाक्य जोडणाऱ्या अविकारी शब्दांना उभयान्वयी अव्यय असे म्हणतात. क्रियाविशेषण अव्यय - क्रियापदाची विशेष माहिती सांगून क्रियापदाची व्याप्ती मर्यादित करणार्‍या शब्दाला क्रियाविशेषण असे म्हणतात. ज्याप्रमाणे विशेषण हे नामाबद्दलची विशेष माहिती देते, त्याचप्रमाणे क्रियाविशेषण हे क्रियापदाबद्दल विशेष माहिती देते.